2016年10月23日 星期日

靚太Club X 拉斐特 親子雞蛋仔烹飪學堂


話說龍媽媽上星期六參加了生活易靚太ClubX拉斐特親子雞蛋仔烹飪班。

今次的活動在油麻地的拉斐特舉行,地點十分方便,油麻地地鐵D出口,一出地鐵站就見到!



一入到活動場地,就見到很多氣球佈置,造型逼真的獅子氣球、可愛有趣的白免氣球,立即吸引小朋友的眼球,龍哈仔都爭住同氣球影相!

而最令龍哈仔流連忘返的相信是呢個城堡的彈彈床,彈彈床永遠都是小朋友最愛的遊戲之一!


今次的活動安排得非常好,小朋友在等候整雞蛋仔的過程中,大會安排了遊戲姐姐同小朋友大玩遊戲!


遊戲姐姐同小朋友大玩彩虹傘、收買、拔河等遊戲,玩了大半個小時!


每個小朋友都玩得好投入,成個氣氛都好好,加上拉斐特的場地好大,所以小朋友可以盡情玩遊戲!


而在場的另一邊,小朋友就可以輪住整雞蛋仔,雖然蛋漿是預先準備好,但小朋友可以自已調配自已喜愛的口味,分別可以加入朱古力粉、士多啤莉粉或者彩朱。

朱古力怪的龍哈仔當然首選朱古力,將朱古力粉溶入蛋漿中,再將蛋漿例入雞蛋仔夾中,然後每邊熱兩至三分鐘就可以!

雖然只是好簡單的步驟,但對龍哈仔來說已經是一個好新奇有趣的體驗!


剛整好的雞蛋仔外脆內軟,帶有香濃的朱古力味,龍哈仔食過唔停口!

導師IVY媽媽話整雞蛋仔最重要的是時間的控制,整好後一定要用風扇吹上五分鐘以上,先可以造到脆口的感覺!



今次活動,大會仲預備了精美的茶點,有不同類型的甜品,炸薯條、魚柳、三文治、水果、雞翼、腸仔、意粉等…

全部都是小朋友最愛,食物的味道唔錯,龍哈仔都食了唔少!


在另一邊,遊戲姐姐不斷幫小朋友畫手同面,龍哈仔就選了它最愛的恐龍,姐姐畫得好快手,好可愛,畫完之後龍哈仔仲珍而重之,洗手時都小心翼翼,怕會洗掉。






最後仲有小朋友最愛的扭氣球環節以及扭蛋環節!

今次的活動安排得十分好,無論是活動的地點、場地、食物定環節,龍哈仔玩到樂而忘十分感謝靚太Club 及 拉斐特!

原來拉斐特除了有證婚服務外,依家仲可以舉行百日宴及生日會,上面的服務及環節全部都可以在拉斐特提供到,有興趣的朋友們可以到以下網址:



圖像裡可能有3 個人

息,或者是著數情報快DLikefacebook

2016年10月18日 星期二

【團購】勁抵食的泰國菜-拳王泰國餐廳


話說上星期是龍哈仔的婆婆生日,龍媽媽一家同埋龍哈仔婆婆、姨仔、伯婆等一行六人去到銅鑼灣的拳王泰國餐廳為龍哈仔婆婆慶祝!

其實龍媽媽經常買團購,團購的質素通常好壞參半(真是要睇你好唔好彩),但今次龍媽媽買的呢個團購真心覺得超值,絕對要enore!

餐廳以拳手為主題,一共有兩層,位於銅鑼灣的謝斐道,都非常方便,而環境幾闊敞,一人一張沙發椅,坐得都幾舒服!

簡單介紹一下今次的團購內容,龍媽媽買的是6人午市套餐,包了每位一個午餐,午餐都幾多選擇,上面列出的都可以叫,每人仲包一杯飲品、咖啡、奶茶、檸茶、檸水等,凍飲都唔使額外加錢!

另外仲有一份鳳爪沙律、一條泰式爐魚以及椰青榚送,咁多食品加埋都只是$288!
(龍媽媽在Groupon買的,有時Groupon會做優惠,輸入優惠碼就可以有折,大家可以留意!)

下面都團購的link,而家仲有4人餐以及6人餐賣:

https://www.groupon.hk/deals/hongkong/thai-lunch-set-at-champion-thai/721293724


原本以為團購咁抵,食物的份量一定會好少,點知最後龍媽媽一行六人都食唔曬!

先說說六人餐送的泰式爐明魚,開頭以為送的魚會好細,點知好大條,同平時在泰國店的爐明魚一樣大,魚的肉質非常滑,配上甜甜酸酸的醬料十分開胃,而且魚不太多骨,配上不同的配料(豬肉、草茹等),連平時唔食魚的龍媽媽都食了不少,呢條泰式爐明魚平時單叫就要過百以上,單是食它就已經值唔栗價!


除了爐明魚外,6人餐仲送了一份鳳爪沙律,沙律的份量都幾多,有一大碟,無骨的鳳爪非常有咬口,加上不同的配菜,非常爽口,開胃,不過就偏辣少少,愛辣的朋友們應該幾鐘意!


在午餐方面,龍媽媽選了6個不同的食物,大家一起分享,首先呢個泰式豬手飯是必叫之選!豬手已經起了骨,入口啖啖肉,而且入口即溶,配上甜酸醬又是另一種的風味,相比坊間其它的餐廳,它的豬手真是幾出色!


海南雞飯又是去泰個餐廳必叫的菜之一,套餐的雞的份量比較少,只有四、五件,不過以咁的價錢不能要求太多,雞的肉質都幾嫩滑,配上醬汁味道都唔錯!


套餐亦有青紅咖(配豬肉 / 牛肉 / 雞肉 / 雜菜) 擇,龍媽媽今次試了它的青咖配豬肉,青咖幾香口,入口唔會太辣,配飯一流,下次有機會再試一下它的紅咖


泰式炒金邊粉是店員推薦的,金邊粉炒得十分香口,亦唔會太油,配上碟上的青檸及炸蒜又是另一種的風味!

菠蘿炒飯,無原個菠蘿上有點失望,飯炒得唔錯,粒粒分明,不過無咩菠蘿味,但加上腰果和肉鬆在飯上,立即令口感幾得十分豐富!


龍媽媽仲點了個海鮮辣椒膏炒河,呢個是咁多個菜式中最遜色的一個,炒河無咩配料,而且十分辣!


最後椰青榚,呢個椰青糕雖然是送的,但真是值得一讚,椰青糕有非常濃鬱的椰子味,而且不會太甜,食落去仲會有十分細粒的椰子,口感一流,甜而不膩!讚!

綜合來說:團購可以在星期一至日都可以用(彈性十分大),而且不洗加一服務費,以平均每人$48一個Lunch來說,真是超值!而且送餐的速度都幾快,店員又唔會因為用團購卷而服務變差,食物的質素及分量都唔錯!所以大家可以一試!


食完就帶了龍哈仔去北角和富玩夜光波波池!

圖像裡可能有3 個人

息,或者是著數情報快DLikefacebook



2016年10月13日 星期四

【元朗一日遊中】回歸大自然之元朗大棠有機生態園


秋高氣爽,當然是郊遊的好時候,入到元朗當然要去郊外玩下,今次龍媽媽一家就去到元朗大棠的有機生態園

龍哈仔未出發先的興奮,因為龍媽媽預早同他講,今日可以有機會騎馬仔!


生態園的入場費每人$30,另外有套票賣,每張套票包4格(每種活動的需要格數都唔同),
入場後可以再補買套票,所以大家可以先買一套,唔夠玩的時候再買!


一入到園的泊車位,就見到一大棚的鴕鳥,連龍媽媽都未見過鴕鳥,隻隻鴕鳥都十分高大!


去馬房的沿途可以見到很多唔同的蔬菜水果,荔枝、龍眼、楊桃、木瓜、大樹菠蘿、瓜、辣椒等等,全部都是有機種植,比平時龍媽媽見到的蔬菜更加新鮮同大,真是恨不得爬上樹摘返屋企食!可惜依家唔是摘士多啤梨的季節,下次有機會一定要再黎摘士多啤梨!


終於去到馬房,除了可以近距離接觸馬匹之外,仲可以餵馬仔食紅蘿蔔!一杯一個格數,維返起$20一次,都可以接受!馬仔的表現好可愛,完全唔會怕人,仲會主動去親近你!




之後就輪到龍哈仔最期待的騎馬活動,一次要兩格(即是$40一次),龍哈仔勁興奮,一D都唔驚,坐在馬上表現非常淡定,不過一圈勁快完,都唔夠一分鐘就騎完,所以都算幾貴,不過龍哈仔總算一嘗騎馬的滋味!


之後就去到荷花池同湖心亭,環境幾幽美,不過見唔到荷花,但見到好多錦鯉,錦鯉超可愛,一伸手它們就會遊過來,可能以為我們身上有食物,如果大家想餵錦鯉亦可以買魚糧餵,都是一格($20一包!)


之後見到好多小朋友玩兒童遊戲車,一次要兩格(即是$40),可以周圍踏15分鐘,龍哈仔的腳比較短,所以應該踏唔到,加上龍哈仔興趣不大,所以最後都無試!



想維繞生態園一圈,可以選擇坐呢個牛牛車站,每次一格($20)!


小朋友其實好簡單,單單是呢個兒童樂園同大型繩網陣都足以龍哈仔玩上一個鐘,呢款大型繩網陣在香港真是少之又少,對小朋友來玩真是好有挑戰性,龍哈仔剛開始都唔成功,在龍媽媽龍爸爸的協助下終於挑戰成功爬到最高,龍哈仔仲好有成功感添!

如果屋企附近有一個咁的大型繩網陣就好,對小朋友來說是一種好好的訓練,有二個八九歲的女仔可能太驚,驚到喊,所以有時適當的挑戰對小朋友來說都是一種磨煉!



再行入少少就見到個小型的彈彈床,呢款彈彈床對龍哈仔來說興趣不大!




生態園裡都有許多唔到的動物,雖然無獅子、老虎等大型的動物,但對於小朋友來說鴕鳥、孔雀、山羊等動物都是新奇有趣,龍哈仔不停問呢種是咩動物?


有得餵羊仔,龍哈仔顯得勁興奮,一杯滿滿的紅蘿蔔,只需要一格$20,都幾抵玩!

龍哈仔仲會叫D山羊唔好爭,餵了的山羊跳高問他再要,龍哈仔會正經八道地說:‘你已經食左,要留返其他羊仔!’勁搞笑!

而龍哈仔的麻麻都餵埋一份,所以都算一種老少咸宜的活動!


除了山羊外,仲有小白兔,野豬、狼狗等,而小朋友可以近距離摸同餵呢D咁可愛的白兔仔!


最後因為仲有一格未用,龍哈仔就玩了個沙樽手作,今次是龍哈仔第一次整沙樽,呢款小手作除了可以學顏色之外,仲可以訓練小肌肉,要將沙入落小小的樽內對小朋友來說都是一種考驗,最後龍哈仔都可以獨自完成!

其實場內撈金魚等的活動,不過時間有限,龍媽媽們要去下一個景點-屏山文物徑出發,所以無玩到!


大棠有機生態園
網址:http://ttlv.hk/


【元朗一日遊上】回到六七十年代潮嘆一盅兩件之老馮茶居


圖像裡可能有3 個人

息,或者是著數情報快DLikefacebook



2016年10月12日 星期三

【元朗一日遊上】回到六七十年代潮嘆一盅兩件之老馮茶居


九月初九除了是重陽節,仲系龍哈仔的姑姐農曆生日,剛巧碰上星期日,於是一家大細出動到元朗玩返一日!

今次的行程非常緊密,先去元朗的老馮茶居嘆一盅兩件、再去元朗有機生態園、屏山文物徑,最後返到屋企附近大吃越南美食,所以大家得記留意龍媽媽的分享!

身為港島人,真是好少機會到新界地方,元朗當然有唔少的美食,但要適合一家大細,飲茶相信是一個唔錯的選擇!

精心挑選下今次去到一間以六七十年代舊香港為背景裝飾的茶居-老馮茶居


茶居處處都有六七十年代的佈置同擺設,小至舊電話(舊到連龍媽媽都未見過)、收音機、花露水、火水燈…大至醬油店、士多、雜貨店,連舊式公屋的上下格鐵床、晾衫竹、鐵閘都一一在茶居呈現!唔講以為自已去到博物館,不過在呢種懷舊的氣氛下用餐是別有一番風味!







茶居的位分為2種,無論是「冰室」卡座還是「大牌檔」圓枱摺櫈都充滿了懷舊的氣息!


至於茶杯、茶壺以及碗筷就用上了周星馳電影中最常用的公雞碗,呢種公雞碗在香港真是買少見少!




今次龍媽媽一行六大一細,總共叫了十一樣點心,其中有幾款更是平時好少見的!

第一款:蝦醬蒸腩仔飯($38)

平時去飲茶經常食鳳爪排骨飯或者北菇滑雞,呢蝦醬蒸腩仔飯真是好少見,肥瘦適中豬腩肉用蝦醬醃過,帶有濃濃的蝦醬鮮味,腩仔入口鬆軟,配飯一流,不過肉本身已略咸,所以唔需要加豉油已經夠味,加了豉油就太咸。




第二款:沙嗲豬大腸($20)

平時飯茶真是好少食到豬大腸,就算食豬大腸平時都以炸為豬,沙嗲豬大腸就真是未食過,豬大腸得幾入味,滑滑的,不過龍媽媽就覺得大腸偏咸了少許,而沙嗲味就唔太突出!



第三款:古法千層糕($20)

呢款千層糕據說是六七十年代極為流行的點心之一,千層糕加入了咸蛋黃、奶黃、冰肉等材料,食起來層次分明,帶有淡淡的咸蛋香,是道功夫菜!



除了之外,龍媽媽仲叫了蝦餃、蟹子燒賣、粉果、排骨、雞紮、蘿白糕、叉燒腸以及腐皮卷等點心,腐皮卷香脆可口,十分鬆化、蘿白糕略油,但茶居的甜醬及辣椒醬十分出色,點上醬後令蘿白糕加分不少、叉燒腸皮薄夠滑、粉果水準就比較失色,而其它點心就不過不失!

值得一讚的是它的茶,今次點了一壺普洱同一壺香片,普洱就一般,但香片就香氣撲鼻、齒頰留香,以$3一個茶位,真是比好多酒樓優勝!


最後埋單,七個人連茶位,連十一款點心總共$305,價錢一D都唔貴!

老馮茶居
地址:元朗大棠路66號
星期一至日 早上8時至凌晨12時


 龍哈仔龍媽媽

息,或者是著數情報快DLikefacebook