2013年3月31日 星期日

瘋狂敗家之旅♥三日兩夜♥吉隆坡自遊行♥搵食篇(DAY 1)

上回講到龍媽媽去到酒店放底曬所有行李,
參觀完一輪之後當然要把握時間,
四出搵食先啦!
起初龍媽媽和友人唔系好識路,
不過自由行有處好,就系唔趕時間,可以四圍行,
其實吉隆坡的商店和商場同香港差唔多,
四圍都可以見到熟悉的品牌,
例如H&M(超貴,香港的標價,但馬幣的收費,即是貴香港2.5倍以上)
麥當勞、KFC、佐敦奴等等…
真系咩特別,
所以同友人慨歎全世界化的威力,
如果處處都只系見到呢D品牌,
又何必去旅行呢?

不過好在今次旅行仍然見到D新奇、獨特的野!
第一日除了行商場,當然唔少得搵野食啦!
其實馬來西亞都有很多正野食,
肉骨茶、椰漿飯、串燒…喜歡吃香口熱氣野的你,一定咁你口味,
幸好在馬來西亞食野對比香港黎講都仲平D,
所以龍媽媽都可以盡情地試試試…
最後增磅當然唔少得!哈哈哈!



由於上一場的時候已經系食飛機場的時候,
所以龍媽媽同友人決定立即買野來醫下肚先,
行行下,見到一個賣漢堡包的小攤,
雖然旅遊書無介紹,
但有時唔系下下都要靠介紹先去試!
呢個街邊檔都有很多種包給我們揀,
有chicken、beef、hotdog和benjo!
龍媽媽揀了個chicken special(RM3.5 約$9港幣),
而友人揀了個Beef burger(RM2.5 約$6.5港幣)!
價錢一D唔貴!


用料非常豐富,即叫即整,非常新鮮!


檔主手法非常純熟,手起刀落,唔洗3、4分鐘,
2個又香又正的burger出爐了!


雖然系街邊檔,但非常衛生和細心,
在包紙上寫了邊個系beef,仲附上紙巾添!
你可能問街邊檔唔驚食壞肚咩?
其實龍媽媽行過很多街邊檔,都見它們的衛生搞得好好,
完全無垃圾周圍拋和小動物,
所以龍媽媽都好放心,加上大菌食細菌嗎!


大家睇下材料超多,又多汁,最重要真是所有材料即叫即做,
見檔主落了很多調味,又美極,又甜酸醬,
總之正過快餐店多多聲!

馬來西亞真系好熱,熱到龍媽媽不停想飲野和食凍野!
行到一間超市,當然要睇下有咩野飲,
估唔到給龍媽媽發現了佢!
超超超好味的雪條它好味的地方是唔同香港賣的雪條咁,
一味裡面得甜和冰,
它系有果肉系裡面,而且超多!龍媽媽試了個大樹菠蘿,呢個味在香港從來無見過,好特別,
而且味道好天然,有超多果肉,價錢仲好平(RM1.8 即是$4.5港幣)
咁的價錢在重港一定食唔到咁的質素的雪條,
龍媽媽好想打包幾益返香港給龍爸爸試,
不過無法打包,所以在3日的旅程下吃了3支!
路邊都有人作行為藝術表現,
不過賣相無咩特別,
大家可以見到,四圍都是麥當勞,佐敦奴的店鋪!
行行下,終於來到我們今晚搵食的目標啦-阿羅街!
整條街都系餐館,你想食的野都可以在裡面食到,不過水準參差,
龍媽媽見咁多野食,所以決定2晚到系度食,唔洗煩!



第一晚就來到差唔多所有旅遊書都有介紹的黃亞華,
黃亞華系成條食街中唯一一間無人系門口拉客的餐廳!
食物選擇都很多,不過在未離馬來西亞時已經想好食咩啦!


先來一杯冰凍透心涼的青檸話梅汁又酸又甜,好開胃啦!
用料十足,真系有粒話梅在杯裡面,好正!好特別!必試呀!
價錢絕對唔貴,龍媽媽唔記得幾錢啦,不過肯定唔超過$10港幣一杯!


再來燒雞翼(RM 2.7/一隻 即7港幣)
炭燒雞翼是每本旅遊書都推介的!
雞翼燒到皮脆肉嫩,加埋個酸酸甜甜的汁又是另一種風味!正




之後另一必食之選,串燒雞、牛、羊每串RM0.8 即$2港幣,抵(最少叫十串)
串燒好唔好食,首先睇下它的肉質硬唔硬,燒得香唔香口,
而最重要的是它的汁,
黃亞華的串燒汁又香又濃,好好味!
當你試過黃亞華的串燒,你就會覺得在同一條街,它的水準算真系幾好,
龍媽媽第二日在同一條街食等二間串燒比它貴,但味道卻比不上它!



最後叫了一碟通菜,叫馬來西亞風光,
炒得好香,好惹味,但價錢卻不抵食,
少少一碟,只有4、5口,卻收RM11,即差唔多30港幣,
好似唔系好合比例,
菜反而比肉食貴!不過真系幾好食!
其實龍媽媽仲想試埋燒魔鬼魚,不過以100g計算,
一條魚少極都要500-600g以上,即是起碼都RM40-50,維起成$100港幣以上,
咁就唔系好抵,所以留返下次先!

呢餐飯太約RM40,即是約$100港幣,都唔算太貴,幾抵食!


馬來西亞真系好熱,所以龍媽媽不停咁買野飲,
來到吉隆坡,當然要試下它幾出名的羅漢果冬瓜龍眼茶!


真系好平,凍RM1.8一杯,即系$5港幣到,而熱的就RM2,
咁熱無理由飲熱的!



唔好以為,RM1.8就好細杯,
一樣系大大杯的,味道好濃,好甜,
甜得來系天然的甜,
其實羅漢果好有益的,而且本身就帶甜味,
所以呢杯飲品都好有益,
我發覺馬來西亞人食咁多熱氣野都唔會有痘痘或者熱氣,
唔知系唔系同他們會飲羅漢果和肉骨茶有關呢?
龍媽媽呢3日食了咁多熱氣野都無熱氣,
唔知系唔系因為飲了2杯羅漢果和肉骨茶呢?

好啦!吉隆坡之旅的Day1完了,
由於太累了,所以龍媽媽都無四圍去,好早就返酒店,
下一集龍媽媽會介紹一下,龍媽媽入住的酒店自助早餐,
真系好豐富,又好食!

想睇返之前幾篇內容,可以按下面,多謝大家收看!

2013年3月27日 星期三

Bonding Moments start with you & Oreo


早幾日龍媽媽去到了中環太子台的Another Fine Day!
今次龍媽媽拋下龍哈仔並唔系去吃喝玩樂,
而系有一個非常重要的任務!
就系參加由OREO舉辦的圓桌發佈會!
當日大會邀請到臨床心理及家庭輔導專家Ms. Judy Wong ﹝黃美容女士﹞
和我們幾位媽媽一齊分享有關親子關係的重要性親子貼士



提起OREO大家一定會想起它的獨特食法「一擰、一舔、一浸」,
龍媽媽亦都好鐘意咁食(大家千其唔好笑龍媽媽!),
大家可能會奇怪Oreo系一間曲奇公司,
無啦啦做咩會搞一D親子的活動!
原來oreo發現香港的父母同其他國際城市的父母一樣,
在沉重的工作和生活壓力下,忽略了親子時間的質素!
有鑑於此Oreo就搞了個《Bonding Moments 由oreo開始》的一系列活動,
希望能夠提醒父母家庭歡聚時刻的快樂和重要性,
以及鼓勵父母增強與子女的關係!
咁有意義,龍媽媽當然支持啦!


在活動裡面,除了一邊食呢D咁美味的茶點外,
龍媽媽亦聽到很多媽媽和Judy分享了不少的育兒心得,
真系令龍媽媽獲益良多!
小朋友好快大,在他細過時如果你錯過了和他建位一個良好的關系,
當他們大過了之後,就算你用再多的時間亦好難修補!
其實很多媽媽都是全職媽媽和在職媽媽中不停爭札!
龍媽媽亦因為咁有過煩惱,
龍媽媽出來工作,家裡多一份收入,
一定可以給龍哈仔有更好的物質和穩定的生活,
但龍媽媽唔想失去分享龍哈仔童年的機會。
所以龍媽媽在當中做了一個取捨,
就是做part-time媽媽!


時代唔同了,以前的時代無現今的社會咁複雜,
很多野都唔可以再用以前一套套入現今的社會裡,
以前無親子時間的概念,
天生天養,唔使教就可以令孩子獨立成材!
但現在社會唔同,小朋友的IQ個個都好高,但EQ就好低,
小朋友可以接觸的資訊好多,但辨別是非對錯就要靠我們父母把關!
所以龍媽媽無論幾忙,每晚都會透過同龍哈仔講故事來教他道理!

今次的活動真系好開心,除了可以聽到很多媽媽的經驗之談,
仲加強了龍媽媽要抽多D時間陪龍哈仔的決心!
而且仲可以到聞名已久的another fine day試下它的下午茶,
環境真系好靚!食物亦都唔錯!
再一次多謝Oreo舉辦今次的活動!

而Oreo而家做緊抽獎活動,買滿$30就可以抽獎,
大獎是雙人暢遊新加坡環球影城及馬來西亞樂高樂園旅遊禮卷(價值:$18000)
真系好吸引!詳情可以睇oreo的facebook:
https://www.facebook.com/?ref=logo#!/oreo?fref=ts

不過龍媽媽剛去完馬來西亞,暫時未有時間再去,
呢個好運就留給大家!祝大家好運!

2013年3月25日 星期一

瘋狂敗家之旅♥吉隆坡自遊行♥四星級酒店篇

上回講到龍媽媽去到吉隆坡的中心站KL Sentral,
龍媽媽首先要到酒店check in和放底行李先!
於是就去乘單軌火車 (Monorail)龍媽媽覺得吉隆坡的單軌火車就好似香港的電車一樣!
價錢都幾平,站與站之間大約1RM(2.5港幣),
而龍媽媽的酒店就位於火車的第七個站Raja Chulan,
由KL Sentral去大約要10分鐘,收費是RM2.5,
火車站與站之間很近,差唔多等於香港電車咁近,
而沿途亦可以欣賞下它的景色!



吉隆坡設有多條鐵路,但注意!
各鐵路獨立運作,不設轉乘,即是必須出閘後再入閘。
所以比較麻煩和唔方便,
單軌火車 (Monorail)的站亦遠離KL Sentral,
需要步行5-6分鐘先找到,
而且都幾難找,所以建議大家去到KL Sentral 之後,
要問一問下當地的人點去,
如果唔系就有排先找到!
 



而它的車票設計就和深圳一樣,
是一個膠幣,有電子的售賣機,亦有售票員賣,
買了之後入閘時就用感應,
出閘時就將膠幣投入,咁就ok!




吉隆坡的單軌火車好細,只有一卡!


不過比香港的電車好的地方是有冷氣,
因為吉隆坡的單軌火車都幾多人坐,
加上吉隆坡的中午真系好熱,
所以有冷氣真是好舒服,
而到每一個站都有提示!
而且可以帶行李上車!
所以龍媽媽覺得它是香港地鐵加電車的混合!
龍媽媽覺得自由行有個好處,
就是可以感受下當地人的生活文化,比較實在!


幾經辛苦龍媽媽終於來到今次入住的酒店!
因為第一次來和唔識路,找了好耐,不過其實好易找,
只不過系因為龍媽媽手上的旅遊書指示唔系好清晰,所以先搞了好耐!

Impiana KLCC Hotel
http://kualalumpurhotels.impiana.com.my/

今次的獎品包的酒店是4星級酒店,
龍媽媽上網睇過好評好多,特別是它的自助早餐,真是無得彈!
而且鄰近雙子塔等大型景點!
好!等我們一齊參觀下呢間酒店先!


都幾大規模,鄰近亦有好多間唔同的酒店!
check in都好快,而每一晚住宿,我們需要給RM200做deposit!
所以兩晚,我們就給了RM400(約$1000港幣),
大家可以給卡或者給現金!


酒店的治安做得唔錯,無論是酒店四周的治安環境,
定是酒店來身的治安都幾好!
要有房卡先可以上到樓!

酒店佈置比較簡約,不過都好新,好整潔!

終於入到房了,都好大,
仲大過龍媽媽上次入住的金沙城酒店少少,而且好新!


張梳發好舒服,環境一流!



有齊所有設施,連熨斗都有!


而桌上的免費茶和咖啡是用雀巢的,
開頭以為連nuts都是free,
好在睇清楚個price list,一包要RM8(差唔多$20港幣)!



而洗手間的用品質素亦都唔錯!


洗手間都好大!
最後送上酒店外面影的相,
一行出酒店就可以見到雙子塔,
環境真系好靚!
下期龍媽媽會介紹吉隆坡的美食!!!

想睇返上集的內容可以到下面:
瘋狂敗家之旅♥吉隆坡自遊行♥未出發先興奮篇

2013年3月17日 星期日

瘋狂敗家之旅♥三日兩夜♥吉隆坡自遊行♥未出發先興奮篇



龍媽媽幾經辛苦終於清了手頭上幾篇試用文,
終於可以出龍媽媽最愛寫的旅遊記,
話說龍媽媽上年參加了facebook遊戲,
居然給龍媽媽中了吉隆坡的3日2夜的飛機票連酒店!
真是唔知行了咩大運!
原本想同龍哈仔和龍爸爸來個family旅行,
不過龍哈仔實在太細了,
唔適合去咁長途的旅行,
但我們又唔放心奶奶照顧龍哈仔,
而和龍爸爸商量下,龍爸爸決定放龍媽媽3日大假,
叫龍媽媽相約老友去,自已留港照顧龍哈仔!
(龍爸爸好偉大呀!真系抵錫!)
所以就系咁的情況下龍媽媽就同識了十幾年的老友,
兩個一齊在吉隆坡進行了一個敗家之旅了!
今次的遊記,龍媽媽又會分幾個部分,
介紹一下龍媽媽住的酒店吉隆坡的美食
而今次的重點是馬來西亞的手信篇
希望大家會鐘意!

------------------------------------------------------------------------------------------------------------------------------

在未開始遊記之前,龍媽媽給少少馬來西亞吉隆坡的資料給大家先,
馬來西亞一年四季都是夏天,沒有四季之分,介於25度到34度之間, 早晚溫差有點大,
龍媽媽去百年換馬幣時,匯率是RM1對2.56港幣,
吉隆坡的消費和香港差唔多,
馬來西亞的關稅比較重,
所以買進口貨會比香港貴,
但買本土貨或者鄰近國家的貨品就比較平(龍媽媽在手信篇會詳細講)!
馬來西亞的電壓和香港一樣,所以大家唔洗帶轉壓器!
而如果你想去馬來西亞,記得護照的有效期要半年以上,不過唔洗簽證!

----------------------------------------------------------------------------------------------------------------------------------

今次龍媽媽乘坐國泰的機,在8:50就要起飛了,
為免遲到,龍媽媽坐最早的機場快線,從香港站到機場,
若果大家要坐機場快線,記得買2人同行、3人同行或者4人同行的優惠!
咁早來到機場,當然要食返個早餐先啦!


估唔到機場都有個咁平的早餐優惠,好似唔錯,
慳家的龍媽媽就試佢啦!
$22蚊有個通粉,有2件炸雞,有飲品,
在機場算好抵啦!



至於味道都算唔錯,雞是新鮮炸的,都幾香幾滑!

一睇呢個蕃茄通粉就知道是味精湯,不過$22蚊仲想要求D咩,留返個肚去吉隆坡食餐勁的!



今次龍媽媽坐的是國泰CX723去吉隆坡,

全程大約4個鐘頭,都唔算太長途的機,
唔知吉隆坡是點呢!未出發前馬來西亞的沙巴剛發生動亂,
馬來西亞屬黃色外遊警示,加上聽聞近來馬來西亞的治安較差,
所以有點擔心,始終兩個女仔自由行,
難免有點憂慮,
幸好,治安比想象中好,而馬來西亞的人都好友善!


一上到機,先來一杯welcome drink,飲杯橙汁開下胃先!



在高空看呢個世界,實在太靚了,
活著就是美好的一日,
看到美麗的藍天白雲,人都變得精神開朗!


接著是飛機場的時間,D人成人話飛機場難食,
龍媽媽覺得國泰的飛機餐唔差,幾好食,
每樣少少,有麵包,有生果,有乳酪,有主菜,唔錯!!!
原本旅行社的紙上寫呢程機包一餐小食,
龍媽媽覺得呢餐都應該唔是小食,應該是午餐來的,
龍媽媽要了蘑菇炒蛋配腸仔
雖然有D淋,不過起飛後個幾個鐘先派飛機場,
淋是在所難免的,除了淋,味道、溫度,龍媽媽都覺得好好!


友人要了個魚飯,賣相唔錯,友人都說味道好好!
其實呢程機除了坐位比較逼之外,國泰服務都幾好,
空姐和空中少爺都好好笑容,
加上有最新的電影睇,
呢程機都過得好快!


未落機前,等龍媽媽計下有幾錢可以血拼先,
當然呢度只是一部分,
仲有後援在袋裡,
不過龍媽媽已經拋低了龍哈仔和龍爸爸了,
始終唔好意思花太多!


終於落機了,等行李都等了一段時間!
龍媽媽始乎要換行李箱了,
因為龍媽媽只是帶了幾件夏天衫,個行李箱已經重成10kg,
個箱雖然好堅固,但始乎不太適合血拼的旅程!
好!正式向吉隆坡的市中心出發!


吉隆坡國際機場 KLIA→吉隆坡中環車站 KL Sentral
從吉隆坡國際機場(KLIA)可以搭乘KLIA Ekspres(機場快鐵)直達KL Sentral,
列車約15~20分鐘一班車,
車程時間大約30分鐘,每張票RM35(約90港幣),
價錢和香港的機鐵差唔多,
而由機場去KL Sentral是唔停站的,所以好快就到!
KL Sentral是吉隆坡各大鐵路的中轉站,
所以想去各地方,通常都要到KL Sentral乘車或者轉車!


KLIA Ekspres(機場快鐵)環境都幾好,幾寬闊,途徑可以欣賞下風景!

好!今集到此為止,下一集龍媽媽會介紹下龍媽媽所住的酒店,
可以看到雙子塔的!

有興趣的可按以下連結看下一篇的介紹

2013年3月12日 星期二

龍哈仔6個月啦!



龍哈仔6個月啦!
龍媽媽今日帶龍哈仔到健康院打針,
今日要打3枝針,
龍哈仔好叻,哭了3聲,出了房門就無哭了,
姑娘亦幫龍哈仔做了一系列的測試,
好似試坐、捉玩具等,
龍哈仔都一一通過,
不過唯獨體重方面跌了,
四個月的時候都keep到在50%的線,
但今次量體重,龍哈仔得7kg,只可以達到25%的線,
所以姑娘建議要加多D奶給龍哈仔,
最好加到7安士,
而糊仔亦可以加到一碗半!
龍媽媽一定要努力將龍哈仔養到肥肥白白的!


講返龍哈仔的發展先,
在食方面龍哈仔而家試了米糊了,每次都可以食完一碗米糊!
奶粉方面:而家食七安士,不過有時會食唔曬!
亦開始給水龍哈仔飲,不過龍哈仔唔鐘意飲,飲一、二口就唔飲!
龍媽媽而家會開始整唔同的固體食物給龍哈仔試!
不過因為龍哈仔有濕疹,所以龍媽媽都要小心D!

在坐方面其實龍哈仔在5個多月已經識坐,
不過坐得唔系幾穩,而家6個月已經坐得好穩,
唔使人扶都好以坐到3-5分鐘,都算幾叻仔!

在轉身方面龍哈仔已經在唔使人幫之下自動轉到身,而且轉得好快,所以無時無刻都要睇住他啦!
在爬方面龍哈仔仲未識向前爬,不過就識360度轉方向爬,好搞笑!
龍哈仔似乎鐘意行多過爬,不過專家話爬對BB各方面發展比較好,
所以龍媽媽是唔容許他跳過呢步的!!!




總括而言,龍哈仔除了有濕疹之外,其他都發展得幾好!
希望濕疹可以快D斷尾了!!!