開心慳錢♥五大一小♥二日一夜澳門遊♥遊官也街

於金沙城位於氹仔，所以龍媽媽第一日主要在氹仔遊玩，
氹仔無咩特別食和玩的地方，
其中一處應該是大家都好熟悉的官也街，
龍媽媽今次去澳門都有舊地重遊，
其實早幾年都去過行官也街幾次，
今次再去真是大失所望！
除了條街冷清了好多，
有很多店鋪都執了，
D野食仲貴了好多添！

早前睇新聞以為它執了，今次去依然做緊生意，
不過無以前咁誇張，要排大隊和勁多人，
依家只有小貓幾隻！

豬扒包$25一個真是好貴，不過原來唔只大利，
甚本上澳門大部分的店鋪，豬扒包都賣緊廿幾三十一個，
雖然是幾好食，幾香口，不過實在太貴，
我們一家去食，叫了4個，咁就要$100，
可以去食餐飯啦！

其實而家香港都有賣鉅記和醉香園的手信，
以前它的手信無咁貴的時候都會買一袋、二袋返去，
不過而家加價，貴了好多，所以都是象徵式買D返去！

澳門除了食之外，它的建築真是保存得幾好，
又唔會好密，有D仲好有特式添！

好在有D出名的餐廳仲系度，不過都是加價加了好多，
例如莫義記的大菜糕，加到要$18一個，太貴了！
相信澳門的物價和香港一樣，通漲了不少！

如果大家想去澳門又想省錢，就要睇龍媽媽的澳門省錢記，
教你點樣在銀河食一個25蚊的有湯有水的套餐，
教你點訂自助餐最平，
人多點買船票最抵！

開心慳錢♥五大一小♥二日一夜澳門遊♥金沙城酒店篇

開心慳錢♥五大一小♥二日一夜澳門遊♥參觀鄭家大屋
開心慳錢♥五大一小♥二日一夜澳門遊♥澳門聖誕篇
開心慳錢♥五大一小♥二日一夜澳門遊♥遊官也街

開心慳錢♥五大一小♥二日一夜澳門遊♥慳家篇

開心慳錢♥五大一小♥二日一夜澳門遊♥澳門聖誕篇

聖誕節雖然未到，
但龍媽媽、龍爸爸和龍哈仔以及屋企人一行六人，
預先提早到澳門慶祝聖誕，
澳門的節慶氣氛好好，
好多地方都已經佈置好聖誕燈飾，
尤其是各大賭場，
龍媽媽因為帶著龍哈仔，
所以無咩去旅遊景點，
主要是都賭場睇下聖誕佈置、到官也街食下豬仔包等，
好！就等龍媽媽帶大家去睇下澳門style的聖誕啦！

龍媽媽第一站，來到澳門的銀河，
其實銀河的建築，內裡的裝修都幾有特色，
就算是平時大家都可以去澳門的銀河參觀下！




之後入到去就可以見到個五光十色的噴水池，
配埋聖誕燈飾，真是幾靚！



靚靚的聖誕襪，唔知龍爸爸今年會唔會送聖誕禮物給我呢？
龍爸爸見到，你要識做呢！哈哈！



之後去到東翼，銀河今年有個聖誕夢樂園！



裡面有唔同的攤位for大小朋友玩，
例如畫畫像等，至於價錢，龍媽媽無問，
因為都知應該唔平！



仲有賣糖果的地方！
好在龍哈仔仲細，唔識扭龍媽媽買，唔系實破產啦！



此外，仲有好可愛的X’Mas 人物，
唔消費都可以同他們影下相，
都幾可愛，小朋友應該幾like！



龍媽媽仲四圍影唔同的聖誕樹添！有新濠天地的！



呢個大家估唔估到，
就是威尼斯人度假村酒店！



它戶外的聖誕樹仲靚添！
你睇夜晚睇幾浪漫！



之後就輪到龍媽媽當晚最期待的活動啦，
就是冬日威尼斯的「幻彩四季」！

在2012年11月21日至2013年1月13日期間，每日下午6時至10時 每隔30分鐘一場
於威尼斯戶外人工湖畔旁會免費上演「幻彩四季」3D 光效投射匯演！
在夜晚睇威尼斯的夜景已經好靚，
加埋投射，真是超靚，超有氣氛！
在匯演的途中仲會有人工雪飄落黎！

如果黎緊會去澳門的，
記得去欣賞下，而未有機會去的唔緊要，
因為龍媽媽已經為大家拍下影片，
希望大家會鐘意！

探射完仲有聖誕人物和大家影合照！
你睇小朋友幾開心！
可惜龍哈仔仲未識行！

個個都爭相和它們影相，
有很多人都帶埋BB來感受聖誕氣氛！

睇完龍媽媽和屋企人都覺得好好睇，好有氣氛！
為今次的旅行加添唔少的歡樂！
龍媽媽的澳門之旅差唔多介紹完，
下期就是遊官也街和澳門慳錢篇！

開心慳錢♥五大一小♥二日一夜澳門遊♥金沙城酒店篇

開心慳錢♥五大一小♥二日一夜澳門遊♥參觀鄭家大屋
開心慳錢♥五大一小♥二日一夜澳門遊♥澳門聖誕篇
開心慳錢♥五大一小♥二日一夜澳門遊♥遊官也街

開心慳錢♥五大一小♥二日一夜澳門遊♥慳家篇

開心慳錢♥五大一小♥二日一夜澳門遊♥參觀鄭家大屋

 

龍媽媽今次去澳門帶埋龍哈仔和屋企人去，
今次旅程其中一個重點就系參觀鄭家大屋啦！
其實早一、兩年去澳門已經想睇啦！
但是因為未復修完，未開放，無機會去睇，
所以今次就去了鄭家大屋參觀啦！
好！等龍媽媽講下鄭家大屋的歷史先！

唔知大家知唔知邊個是鄭觀應呢？鄭觀應（1842-1921年）。袓籍廣東香山縣（今為中山市三鄉鎮雍陌），世居澳門，後來往上海從商二十年左右。
早年雖廁身洋行，但關心時政，熱心西學，為洋務運動出力。
1886年5月下旬，鄭觀應回到了在澳門下環龍頭左巷的鄭家大屋，在這裡潛心整理思想，撰成影響深遠的《盛世危言》。
鄭家大屋由鄭觀應之父鄭文瑞始建，根據大屋內之楹聯的落款日期，其建築日期最早可追溯至同治八年，即1869年。鄭觀應 及其兄弟陸續修建，規模不斷擴大。




上面的圖片就是鄭家大屋的圖則，
單從上面的圖片睇就知道當時的肯定是大家族，
而且都幾富有，先會起到咁的氣派！

好！就等龍媽媽帶大家一齊去參觀下呢個鄭家大屋，
龍媽媽影了超多圖片，
希望大家會鐘意！

首先帶大家認路先，
其實鄭家大屋就是亞婆井前地旁，
附近仲有很多有名的歷史建築物，
所以大家去的時候可以順便參觀埋，
大家認住呢個淺藍的屋，
見到行入去就是鄭家大屋啦！


呢個就是鄭家大屋的入口，感覺設計比較簡單，
如果大家有參觀過位於大堂巷七號的盧家大屋，
就會更加覺得鄭家大屋的設計比較簡樸！
好，在未正試開始參觀，提提大家，它的開館時間如下：
開放日： 星期一至星期二、星期四至星期日； 逢星期三休息，公眾假期除外。
開放時間：上午十時至下午六時，下午五時半之後停止入場

是免費入場的，不過大家記住時間，以免摸門釘就唔好啦！

在一入門，我們就見到祭祀的地方，
添福、添祿、生財、生子相信是每一個、每一代的期望！

在入口，我們可以看到好多中式建築裝飾，
睇返它的網頁介紹，原來門樓牆身中部的是叫做灰塑，
整幅灰塑長約15米，
它由許多個不同故事和題材的灰塑組成，包括“鯉躍龍門”、“封侯”、“富貴吉祥”及“年年有餘”等。



門樓一樓外牆上還有一副灰塑對聯及琉璃通花漏窗：
上聯為“駐馬客欣榕蔭古”，下聯為“步蟾人賞桂香濃”，
橫批“留月”。
睇返資料講，前院以前可能種了桂花樹，但後來被改為桃樹一棵。
而對聯內容就是形容緊屋的裝飾和擺設啦！

在鄭家大屋仲有很多唔同的擺設添！

之後你就會見到一個月門，呢個月門。設計都幾特別，好有中國風，
在預料讀中國文化時老師就提到中國的建設風格鐘意和諧和融合，
月門的圓形就充分體驗了呢個風格，
月門後是一條長的走廊，
睇返資料，原來呢條走廊又稱為轎道，
原來鄭家父子都是有官職，而榮祿第是鄭家大屋的入口。
所以訪客前來拜訪主人的時候，都在前面呢條長長廊道下轎或下馬，先步入榮祿第。
而轎夫及隨從等都會在外面等候，所以呢條走廊又稱為轎道。





在轎這的左手邊裡面，有整個介紹鄭家大屋的展版、電影和建築文物等，
其大屋的介紹一覽無遺！




從展版可以見到鄭家大屋未重建前的樣，是相當殘舊！
原來是因為上世紀五、六十年代，鄭家後人分居各地，各自發展。
鄭家大屋多處空間被分租出去，一度曾有300多人在內居住。
出現“七十二家房客”景象。
2001年澳門政府先收購返鄭家大屋的業權，
2002年澳門政府開始對鄭家大屋按部就班地進行嚴謹的修復工程，
用了八年時間，先將昔日面貌基本得以恢復。



如果大家有時間，可以坐底睇下它的介紹，有唔同的語言！




仲有模型等介紹鄭家大屋的所在地！

當然唔少得它的建築用料和今次修補所用的物料等，都有講解！



出了展廳，呢度是通往主房區的門道，
“榮祿第”呢塊牌匾就是說明鄭家是官宦之家。


直去就是主房區，而在榮祿第的右手邊就是文昌廳

在“榮祿第”呢個門道裡面掛了一塊由曾國荃題寫的“崇德厚施”牌匾，
原來是用來表彰鄭家樂善好施的行為。




好！我們先去文昌廳睇下！
文昌廳主要是鄭氏族人讀書的道方，廳堂外廊設圓形月門通向大花園
月門兩側又有一對灰塑對聯，
上聯為“ 現陰陽而合□　”，下聯為“借樓閣以撐天”，
上聯最後一字已唔見了啦！


文昌廳裡面擺了一些鄭觀應的介紹！



在裡面有中、英介紹鄭觀應的生平、家族等！


大家睇下呢張就是鄭氏一家的合照啦！
龍媽媽都幾鐘意睇呢D照片，可以睇返當時人的打扮，衣著等，幾特別！
單睇當時的合照就知他們的規模有幾大！




呢度就是大花園，真是幾大，單是花園的規模就咁大，
當時呢個家族應該有頭有面，
小朋友在呢個花園玩相信會好開心！



從花園看返入去，真是幾靚，古色古香，仲保留了那種味道！

參觀完花園，我們去返到鄭家大屋的主房區！
呢度是大宅的前地，前地為一片廣闊院落，
左手排列了鄭家大屋的主建築，右側是新近復原的瓦花圍牆。



之後我們就去到方形內院，真是很大，很通爽，相信住在度一定冬暖夏涼！



睇下，幾古色古香，D柱用了西式的設計，似乎內院用了中西合壁的設計！



內院為兩層高，下層開敞，設中式月門及葫蘆窗洞，柱子則具有西式柱帽及柱礎；
上層設有連續的排窗，分兩層，其下為支摘式木百葉窗，其上則為固定的貝殼窗。
它呢個設計組合令呢個內院帶點東南亞設計的風味！



之後我們就來到主建築
主建築為兩座傳統廣東式住宅，即餘慶堂和積善堂。
其中餘慶堂是鄭氏家族主屋，入口是按傳統的廣東式凹門斗做法：
檐下牆壁有彩繪；門口設有“三件頭”門組，（即矮門，亦稱吊腳門）、趟攏門及板門。
門口掛有“通奉第”牌匾，
兩側對聯分別是“前臨鏡海”和“後枕蓮峰”，
簡單明瞭地概括了大屋選址時背山面海的環境格局和景觀意象。




入到去，可以見到四圍四通八達，又大又通爽，
最重要的是一扇扇古式古香的門都保留了！



經這裡走上去去到餘慶堂，
餘慶堂有分2層





當時樓梯，木門都一一保留和恢複了，
澳門的保育真是做得唔錯！



大家睇下以前的樓梯幾靚！




我們終於來到餘慶堂大廳，好有氣勢，而且書香味好重！
呢度有很寬大的落地窗戶，當時大屋臨海，當時的人可以睇到內港風光和景色！
相信會盡靚和威風！



大家可以見到廳內有四條木柱，而木柱上面都掛有楹聯，
睇返資料，原來都分別書寫了鄭家的處世訓言，
當時的家規一定好嚴！
立刻想起大宅門添！

而橫樑上則掛有“餘慶”牌匾。
“餘慶”原來是鄭觀應之父鄭文端之堂號。
而大廳前後牆頭上都有彩繪。
彩繪真靚，不過都唔夠香港的虎珀別墅靚，可惜香港政府唔識保留！

裝飾得幾有雅緻！I like it！

之後就去到餘慶堂廢的後廳，有一幅由十二扇屏風組成的折線形壽屏，
其雕刻工藝在鄭家大屋現存木雕裝飾中最為講究，也最精美。
果然手工精細！

好欣賞中國古代的建築，建築通常都會有很多窗，
多窗的設計唔單只可以通明，仲可以通風，而且仲可以裝飾添！



行下行下，龍媽媽已經唔知行緊唔到，
因為真是好大，成4000平方米！有成六十多間大小房間！
之後見到有小部分當時的傢具，
你睇下當時的化妝桌，
都幾靚，幾實用，有幾多櫃！

最後龍媽媽積善堂無咩特別就無影相，
龍媽媽的介紹到比為止，
雖然鄭家大屋無盧家大屋保留得咁好，
但它的規模是盧家大屋唔能夠相比，
所以都推薦大家去睇，感受一下當時的官家的氣勢和氣派！

大家有興趣可以上澳門的鄭家大屋官網睇返詳細資料
http://www.wh.mo/mandarinhouse/cn/

龍媽媽的資料報道是參考上面的網址，
至於圖片，除了模擬地圖外，其他都是龍媽媽自已影的，
大家要轉載的話，請問一聲龍媽媽！

開心慳錢♥五大一小♥二日一夜澳門遊♥金沙城酒店篇
開心慳錢♥五大一小♥二日一夜澳門遊♥參觀鄭家大屋
開心慳錢♥五大一小♥二日一夜澳門遊♥澳門聖誕篇
開心慳錢♥五大一小♥二日一夜澳門遊♥遊官也街

開心慳錢♥五大一小♥二日一夜澳門遊♥慳家篇