4th July 2016
龍媽媽已經有好幾年無去過長洲啦！趁住放暑假，帶埋龍哈仔去長洲覓食先！
由於是星期一，當日長洲人唔多，人少少都幾好行，不過有好多食店就無開！
其實長洲真是唔大，行得快的話半日都可以行曬，先去長洲的北帝廟拜拜先，北帝廟又名玉虛宮，已經有百幾二百年的歷史，龍媽媽好鐘意中國的傳統建築，對中國歷史同文化可以說得上情有獨鐘，所以見到一些古屋同古廟都會入去參觀一下！
當日龍媽媽無特別設定路線去行，行的地方同食的地方都是隨心所欲。行行下就行到東灣泳灘。泳灘雖說不上水清沙幼，但景色都幾迷人，看著藍天白雲，心情都頓時變得開朗！
呢間故鄉茶寮，去過長洲的朋友都應該唔會陌生，它在長洲已經有好多年，最出名的莫過於是紅荳餅同手卷，當日試了它的紅荳餅，$6一個十分抵食。
行得熱熱地，龍哈仔立即食番塊冰西瓜，一塊$6，不貴，不過唔系度度地方有得賣，而且比起食雪糕解渴！
長洲除了芒果糯米糍出名之外，要講出名的當然唔少得甘永泰魚蛋。大大粒的魚蛋$10一串，一串兩粒，魚蛋除了大粒之外，龍媽媽最鐘意它的是很有魚味，而且爽口彈牙，另外仲叫了串炸魚肉釀豆卜，$15一串。由於剛剛炸起的緣故，豆卜香炸可口，比起大大粒魚蛋更為吸引！
之後，萬無目的四圍走，行到一間叫聯興餅家的餅店，賣麵包同傳統糕店，麵包同糕店剛剛出爐，香氣四溢，而且價錢相宜，所以買了個腸仔包同紅豆煎餅來嘗嘗！可能是剛出爐的關系，腸仔包十分軟綿，而煎餅就皮薄餡多，煙煙韌韌，腸仔包一個只是$3，而煎餅就$2.5，這樣的質素真是十分抵吃，之後仲買了豆沙月餅同煎餅回家。
來長洲當然唔少租單車玩，由於龍哈仔仲未識踏的緣故，所以租了有後座的單車，一個鐘頭$40，一日就$100。龍哈仔第一次坐單車，所以十分興奮，不停叫龍爸爸同龍媽媽加快！龍哈仔坐在後座當然十分開心，可憐龍媽媽龍爸爸踏到身水身汗，所以租了一個鐘，嘗一嘗單車樂就算，加上一個鐘已經可以維繞住長洲主要街道一圈！
說起長洲除了芒果糯米糍，大大粒魚蛋外，它的海鮮都十分出名，不過相比幾年前，它的海鮮水準真是急劇下降，今次叫了兩個海鮮，分別是豉椒炒蜆同咕嚕魚柳，送了三碗湯同一碟炒菜，豉椒炒蜆味道一般，蜆不太入味，咕嚕魚柳還可以，至於湯淡而無味(不過送的要求唔可以太高)，最後埋單$155，價錢一般，但食物質素就真系麻麻！所以自此之後應該唔會再到長洲吃海鮮了！
暑假應該用來玩樂，從玩樂中學習，製造親子間的「玩憶」！
(呢個暑假龍哈仔唔上興趣班，跟隨著龍爸爸、龍媽媽四處玩，一齊來玩盡港九新界）
沒有留言:
張貼留言