龍哈仔@龍媽媽: 瘋狂敗家之旅♥三日兩夜♥吉隆坡自遊行♥搵食篇(Day2)

2013年4月18日星期四

瘋狂敗家之旅♥三日兩夜♥吉隆坡自遊行♥搵食篇(Day2)

好！又來到吉隆坡之旅的時間，
龍媽媽都知自已好長氣，一個旅程要分咁多篇寫，
不過無辦法，一來龍媽媽想用呢個blog來記底旅行所有細節，
等將來可以回味返，睇下相，睇下自已的遊記！
二來照顧龍哈仔之餘又要返工，無咩時間打blog，唯有分幾篇打！
不過大家放心！仲有3篇到，龍媽媽的遊記就會完，
而最後一篇將會系今次旅程的重點，
就系龍媽媽敗家記和買手信的推介啦！

好！又來到第二日行程的下半部分，
上集龍媽媽講到參觀完當地的廟後，就來到都幾出名的茨廠街了！
龍媽媽覺得茨廠街簡直系香港女人街的翻版！
所賣的野就系A貨名牌、紀念品、衫等等…
其實吉隆坡的商場、路邊店鋪好多賣的東西和香港一樣，
但價錢貴香港好多，所以唔怪得香港有購物天堂之稱，
比較過後香港的野真系又平又靚！

所以來到茨廠街龍媽媽都只系想參觀下，
完全無買過野，來呢度之前龍媽媽已經知呢條街系賣咩，
龍媽媽都要來最主要的目的系來食野！

原本想來試下好出名金蓮記的福建炒麵，
不過早餐太飽，加上太熱啦，
根本食唔落，所以過門而不入！

行下見到賣生果的攤檔，吉隆坡的生果真系選擇又多又甜，而且很平，
一份份包好，放雪櫃，好衛生，一份都系賣1個幾馬幣，即系幾蚊港幣，正！

正餐就食唔落，小食都仲可以！行下見到有麻糬賣，
仲有報紙介紹，而且唔貴，RM5一份(約12.5港幣)

好多花生碎，好彈牙！正！

因為當時已經去到正午，天氣實在太熱了，唔想食野，
只想坐下，嘆下冷氣，估唔到大馬都有恭和堂的分店。

食了咁多熱氣野，飲返杯涼茶消暑下火先，一杯RM2.3(即5.75)，
仲平過香港少少，而家香港飲杯涼茶都要$7以上！
不過在大馬的龜苓膏好抵呀！大的系RM11，細的只系RM8，
大的$30港幣有找！
飲完杯涼茶行下附近有D批發玩具和文具的地方，
發現大陸貨，在大馬的批發價和香港的售價差唔多，
唔怪得大馬人都鐘意來香港掃貨！
行到3點幾，頂唔順返了酒店沖涼休息下再出去！

晚上當然又系搵食的時間，
由於酒店好近阿羅街，所以今晚又再次去阿羅街食晚餐！
原本第一晚想食旅遊書介紹的強記蠔煎，但點搵都搵唔到！
所以第二晚再去搵，終於在呢間西湖裡找到它了！

點解龍媽媽話搵唔到它，全因為它唔系單獨一間餐廳，
而系在西湖裡的其中一個攤檔，
在西湖呢個餐廳裡，你可以叫所有餐檔的食物，
餐牌上有齊所有攤擋的食物了，叫了後，侍應會交紙給攤檔整，
整好後侍應會將食物送到桌上！

見到有肉骨茶，當然要試下啦！它仲有很多海鮮、炒粉麵等…
選擇都好多！
由於龍媽媽和友人都唔系好大食，所以只系點了以下的食物試下！

想試好耐的蠔煎，果然名不虛傳，
蛋漿煎到好薄好脆，蠔仔又大隻又甜，
而家在香港已經好難食到咁鮮甜的蠔仔了，
配上獨特的甜酸汁，好特別，好好味，真想再三回味！
不過價錢都唔平，咁細碟都要RM13，要港幣30以上，
有大、中、小的份量可以選擇！以上當然系小的份量！

來到大馬當然要試下當地最出名的肉骨茶！
龍爸爸都去過大馬玩，話肉骨茶麻麻好食，受唔到它的藥材味！
不過龍媽媽相反，覺得好好味，仲一試就愛上它添！
肉骨茶除了有肉外，仲有豆卜、菜和藥材等
龍媽媽食呢間個湯好清甜，肉和豆卜好入味，唔錯！
肉骨茶好味得來仲可以保身，大馬人系當早餐來食！
所以龍媽媽買了幾包肉骨茶的湯包返香港煲！