好久沒有打Blog啦！由以前的一個月十篇八篇文慢慢減產到而家每個月兩、三篇，並唔系無野同大家分享，而系龍媽媽開始了我兩份part-time的生涯，所以打Blog的時間少了好多，大多數的時間都用來休息和陪龍哈仔。有人可能會問龍媽媽點解唔搵份長工？雖然長工的福利多和人工較高，但相對工作時間彈性就無咁大，而且壓力較高，所以龍媽媽先至作出呢個決定！
雖然龍媽媽做2份part-time，但龍媽媽仍然堅持每個星期日放假陪龍哈仔四周圍玩！
3月8日系龍爸爸同龍媽媽的結婚週年紀念，原本想拋低龍哈仔同龍爸爸去深圳玩(呢個念頭系龍爸爸提出的，哈哈！)，但可能連個天都唔同意我們呢個決定，想我們陪多D龍哈仔，在3月8日的前幾天，我和龍爸爸都相繼的病倒了，所以北上的計劃只好取消，改為family day！
Anyway，其實即使無得北上龍媽媽都唔會太失望，龍媽媽反而想多D陪龍哈仔！當日就決定帶龍哈仔去尖沙咀的科學館！
龍媽媽之前買了博物館家庭通行證，一年二百元，可以有四張卡(即是有4個家庭成員)，一年內可以無限次通行七個博物館，所以今次已經唔系龍哈仔第一次去科學館！
說起科學館，其實裡面都有幾多有趣的實驗，但系龍哈仔始終比較細，所以都系當遊戲咁玩，依家仲未可以理解當中的原理。
玩了一輪，之後就過了去對面的歷史博物館啦！龍媽媽覺得博物館家庭通行證都幾抵，因為一次成人一張門票都要廿幾蚊，加上有特別館又要另收錢，而且可以一家大小四個人去，去足七個館，去多幾次都抵返，所以龍媽媽明年應該會再續卡！
剛剛遇上歷史博物館有特別的展覽，系關於俄羅斯皇室的展覽，展館內有很多俄國皇室的服飾和宮殿用品，其用品富麗堂皇情度可以同中國一樣，有過之而無不及，可惜裡面唔可以拍照，無法和大家分享！
睇下呢個小朋友，有得去玩就立即開心同精神曬！不過見到龍哈仔咁開心，龍媽媽都覺得好滿足！
香港歷史博物館分了好多個部分，由史前到現代都有提及，可以說是麻雀雖小，五臟俱全，而且有D展品都做得幾生動有趣，但就算展品造得幾靚，幾齊全，都無法真實咁呈現真正的香港給旅客或者我們的後代知，與其要將歷史硬性呈現出來，倒不如做好活化的工作，咁樣比看呢D仿真品來得更真實，更有味道！
舊玩具呢部份相信系龍哈仔最有興趣的一part，雖然他對歷史博物館的興趣不大，但龍媽媽好欣賞他仍然能夠安靜地陪龍媽媽龍爸爸行完整個展覽，呢樣事系要讚一讚！
因為龍媽媽和龍爸爸的腸胃都唔太好，所以當日無點食飯慶祝，去了譚仔食米線，食完就陪龍哈仔坐船回家啦！
沒有留言:
張貼留言